Call-center: 1007

Умумий масалалар бўйича: 232-10-07

Ўзбекистон Республикаси Бош прокуратураси

Янгиликлар

БОШ ПРОКУРАТУРАДА УЧРАШУВ

Бош прокуратурада Ўзбекистон Республикаси Бош прокурори Ихтиёр Абдуллаевнинг Корея Республикасининг Ўзбекистондаги Фавқулодда ва Мухтор элчиси Квон Ёнг У билан учрашуви бўлиб ўтди.

Элчи Ўзбекистон Республикаси Президенти Шавкат Мирзиёев раҳбарлигида жамият ва давлатнинг барча соҳаларини ислоҳ ва модернизация қилиш борасида амалга оширилаётган аниқ чора-тадбирлар билан таништирилди.

Хусусан, давлат раҳбари томонидан аҳоли фаровонлигини ошириш, ҳуқуқий давлат қуриш, тадбиркорлик учун қулай шароитлар яратиш ҳамда ҳуқуқбузарликларнинг олдини олиш ва коррупцияга қарши курашиш борасида қабул қилинган қарорлар мажмуи алоҳида таъкидлаб ўтилди.

Мамлакат раҳбари томонидан халққа хизмат қилиш – устувор вазифа сифатида белгилаб берилганлигини инобатга олган ҳолда амалга оширилаётган суд-ҳуқуқ ислоҳотлари, давлат органлари, шу жумладан, прокуратура органлари фаолияти самарадорлигини ошириш хусусида фикр алмашилди.

Элчи Ўзбекистонда рўй бераётган ўзгаришларни катта эътибор билан кузатаётгани ва уларни қўллаб-қувватлашини билдириб, янги ҳукуматнинг фаол иш олиб бораётгани, шунингдек инсон ҳуқуқларини таъминлаш, кичик ва ўрта бизнесни ривожлантириш ҳамда коррупцияга қарши курашишга қаратилган чора-тадбирларни алоҳида таъкидлаб ўтди.

Томонлар икки давлат ваколатли органлари ўртасида ҳуқуқий соҳада шаклланган муносабатларнинг юқори даражада эканлигини қайд қилиб, жиноятчиликка қарши курашиш, ҳуқуқ-тартибот ва қонунийликни мустаҳкамлаш бўйича умумий вазифаларни ҳал этиш борасидаги ҳамкорликни янада ривожлантиришнинг келгусидаги истиқболларини муҳокама қилдилар.

Учрашув иштирокчилари бўлиб ўтган мулоқотдан қониқиш ҳосил қилганликларини, бу эса ҳуқуқий соҳада ўзаро алоқаларнинг ривожланиши ва мустаҳкамланишида янги туртки бўлганлигини билдирдилар.

Учрашув дўстона ва самимий руҳда бўлиб ўтди.


Бош прокуратура Матбуот хизмати

05.04.2017

Ўзбекистон Республикаси прокуратураси